【住好D】日本住宿攻略

【住好D】日本住宿攻略

香港人一年先放得果幾日假去日本旅行，當然要食好住好！呢度講嘅好並唔係「貴」，而係「抵」！先講住宿方面，究竟可以點樣抵法呢？

酒店格價網

市面上有唔多住宿比較網，在云云網站之中，Tripadvisor 就係最值得推薦！因為係日本酒店方面，除左出名果幾間訂房網：booking.com、hotels.com、agoda.com同Expedia外，最難得係佢仲會比較埋日本訂房網：楽天旅遊、JAPANiCAN.com、Jalan.net。而係好多時係係日本網訂會比較抵！

尋找物值高嘅酒店

想搵物值高嘅酒店並唔係難事，因為Tripadvisor佢會有晒用家排名，仲可以因應你嘅住宿要求，如：經濟、豪華等、安靜等篩出酒店排名！而只要你揀頭果幾名都包冇死架喇！

官網訂有時仲平！同有得upgrade～

唔好以為睇左格價網就一了百了呀！因為唔少酒店/旅館會係自己網站度做promotion，早訂21日、14日又再平少少，仲有D Special Package for女性專用呀、夜check in 凌晨check out又再平一大截！點解？因為佢地想個客對自己品牌有loyalty囉！而且，根據酒店業人士透露，如果冇晒房，要upgrade靚少少嘅房俾客，如果差唔多日數，都會揀經官網訂嘅upgrade，因為唔需要再拆佣俾訂房網。

用例子講你知啦：明明上Tripadvisor話淨booking.com先有而且最平房型都要$1094*(未計稅)

入到booking.com睇5晚twin room都要成HK$5905

官網訂有21日早割，即提早21日訂會有discount～都係77,100yen，以今日VISA匯率計都係0.642 = HK$4949.82，平左足吹HK$955，係咪好誇呢？

真實照片唔怕貨不對版

除左睇comment之外，睇相都好緊要架！Before and after 相差太遠嘅酒店都仲有好多！記得訂之前search下有冇真相（Tripadvisor通常都會有架喇）睇comment真係要睇清楚係邊個國家留言！以小編非正式統計，如果連香港人都讚好嘅，9成都會好好架喇！點解就唔洗講喇掛‥‥‥

呢間新宿top10內，正野黎架，梗係差唔多啦！

住得好唔一定要住酒店

多人一齊去旅行最怕就係訂房，而且日本好少好大嘅酒店房，要大就九成都要book D 5星酒店‥‥‥想平又想大仲有另一個方法！住民宿啦！唔好以為民宿一定唔夠乾淨唔夠靚！

以下呢幾間又夠大又有廚房洗衣機洗頭水沐浴露風筒wifi乜乜乜‥‥‥仲靚過酒店！而且你check out左之後一定會有人黎執屋，好多人專係放租出去，又唔係自住，專業民宿黎架！同埋好多好靚嘅都只係收你幾百蚊一晚，係極抵住！

不過要留意返通常民宿就會距離地鐵站遠少少～詳情：https://www.airbnb.com.hk/

得閒係超市買下野食返黎煮幾味都唔錯架！（日本超市D和牛真係好鬼平）

呢間都幾靚～

呢間細細間，但都好精緻！

小貼士：千祈唔好為左慳果少少錢而屈蛇呀！日本係唔俾屈蛇架！

日本旅遊攻略 日本機票優惠 日本訂房優惠 日本酒店優惠 日本旅遊須知

【住好D】日本住宿攻略